Diabetes pillugu ilisimatusartut inuunerissaaviit Steno Diabetes Centerit arfineq marluusut akornanni suleqatigiinnikkut saqqummersitaavoq. Tusarnaagassiat tamarmik qallunaatut immiussaapput.
Imm. Siulleq: Savalimmiuni isikkamik arsaanneq diabetes -imut pitsaaliuutaavoq
Isikkamik arsaanneq timip iltilersorneranut, aap taqqanut naqitsineranut saanernullu iluaqutaavoq – type 2 diabetes-imillu nappaateqalersinnaaneq annikillisittarlugu. Tamanna diabetes pillugu ilisimatusartut pillugit tusarnaagassiami immikkoortumi siullermi matumani annertunerujussuarmik tusagaqarfigisinnaavat.
Magni Mohr, timip nukinnik atuisinnaanngortarneranik ilisimatooq Savalimmiunilu Steno Diabetes Centerimut attuumassuteqartoq Syddansk Universitetimilu isikkamik arsarnermik ilisimatuujusortaaq isikkamik arsarnerup iluaqutitaanik oqaluttuartoq tusagaqarfigiuk.
Imm. Aappaat: Uummatip taqaanut tartukkullu nappaatinut nakorsaatit
Sotagliflozin tassaavoq type 2-diabetes-imik nappaatilinnut nakorsaat, aap akuanik sukkumik aallu taqqanut naqitsineranik pitsaanerulersitsisartoq. Nakorsaatip uummatikkut, taqqatigut tartukkullu nappaatit ajornerulersinnaanerat annikillisittarpaattaaq. Maannalu misissuineq nutaaq, type 1 diabetesimik nappaateqartut uummataannut tartuinullu iluaqutaasinnaanissaanik tikkuussivortaaq.
Elisabeth Stougaard, Steno Diabetes Center Copenhagen-imi nakorsaq/ ph.d., diabetes pillugu ilisimatusartut immikkoortuisa aappaanni matumani tamanna annertunerujussuarmik oqaluttuarigaa tusarnaaruk.
Imm. pingajuat: Uummatikkut taqqatigullu nappaatinik siunnerfeqarluni nakorsaaneq
Inuit diabetes-imik nappatillit uummatikkut taqqatigullu nappaateqalernissamut aarlerinartorsiorput, aarlerinassussaali assigiinngeqaaq. Uummatikkut taqqatigullu nappaatit ikilisillugit pisariaqanngitsumillu nakorsaatitortoqaqqunagu, pitsaaliuinerup suup ataasiakkaanut pitsaaneruneranik aalajangiisinnaanissaq, ilisimatusartut suliniutigaat.
Kristian Funckip, Steno Diabetes Center Aarhusimi nakorsap ph.d., qanoq ililluni immaqa siunissami uummatikkut taqqatigullu nappaatinik nakorsaanermik siunnerfilimmik pitsaanerusumik neqeroorsinnaanissaq, diabetes pillugu ilisimatusartut immikkoortuisa pingajuanni matumani oqaluttuaraa.
Imm. sisamaat: Nunatsinni sinitsilluni anersaartorunnaartarneq diabestisilu
Sinitsilluni anersaartorunnaartarneq nappaataavoq sinnarliortitsisartoq, inuillu sinitsillutik anersaartorunnaartanermik sakkortuumik atuisut qasoqqangaatsiarajupput. Nappaatip nassatarisinnaavaattaaq aap taqqanut naqitsinerata qaffannera, uummatip akulikipallaamik tillilersarnera qaratsallu uummatillu taqaasigut milittoorneq.
Nunatsinniunngitsoq sinitsilluni anersaartorunnaartarnermut kinguneqarluartumik nakorsaatissaqarpoq. Nunatsinni inuit diabetesimik nappaateqartut akornanni sinitsilluni anersaartorunnaartarnerup qanoq atugaatiginera ilisimaneqanngilartaaq, tamannali maanna allanngortinneqassaaq.
Mads Mose Jensen, nakorsaq/ Inuunerissaavik Steno Kalaallit Nunaanni Ph.d., ilisimatusartoq, diabetes pillugu ilisimatusartut immikkoortuisa sisamaanni matumani tusarnaaruk.
Imm. tallimaat: Utoqqarnik paaqqutarinniffinni najugaqartunut pualavallaanut diabetesimillu nappaatilinnut nerisassat timimillu atuineq
Utoqqarnut paaqqutarinniffinni najugaqartut tallimaagaangata ataaseq pallingajattut diabetesimik nappaateqartuusarput ilaallu aamma pualavallaartarlutik. Timimik atuinngippallaarneq imal. puallarnarpallaanik nerisaqarneq pissutigalugit, nappaat diabetes ajorneruleqqunagu, periarfissanik, peqqinnartumik inuuneqarsinnaalersitsisunik neqeroornissaq pingaaruteqarpoq.
Ilisimatusarluni suliniummi nutaami utoqqarnik paaqqutarinniffiit qanoq ilillutik najugaqartunut diabetesimik nappaateqartunut, nerisanik eqqortunik periarfissanillu peqqinnartunik neqeroorsinnaanerat misissorneqarpoq. Tenna Christoffersenimit Professionshøjskolen Absalonimi lektorimit, Steno Diabetes Center Sjællandimi ph.d.-nngorniuteqartumit diabetes pillugu ilisimatusartut immikkoortuisa tallimassaanni tamakku oqaluttuarineqarput.
Imm. arfernat: Saarngit napisarnerannut patsisaasut
Diabetisimut kingusissukkut kingunerluutaagajuttoq – annertunerusumilli qulaajaavigineqanngitsoq – tassaavoq saarngit napisinnaanerannut aarlerinartorsiorneq. Tamatumunnga patsisaasoq suli qulaajarneqanngilaq, misissuinerilli ilaatigut diabetisimik patsiseqartumik sianiutit ajoquserneqarnerisa sunniuteqarsinnaanera ilimanarsisippaat. Inunni type 2 diabetesimik nappaateqartuni saarngit napisarnerisa imminnut ataqatigiissinnaanerat patsisaasinnaasullu allat, ilisimatusaqatigiit maanna misissorpaat. Julie Nielsen, nakorsaq Steno Diabetes Center Nordjyllandimilu ph.d.-nngorniutilik, diabetes pillugu ilisimatusartut immikkoortuisa arfernanni ilisimatusarnermut pissanganartumut tunngasunik paasisaqartitsivoq.Imm. arfineq aappaat: Kikkut misissuutinik iluaquteqarsinnaappat?
Type 1 diabeteseqartuni, aap sukkoqassusaanik uuttuinissami, periutsit arlaqarput.
Inussap nuua kapillugu misissuisarneq amerlanernit ilisimaneqarpoq, ilaasali aap sukkoqassusaata, inussap nuua kapillugu misissuinermi, diabetesip nalimmassarniarnissaa ajornakusoortutut misigisarpaat. Misissuut (sensor), massakkorpiaq aap sukkoqassusaanik takutitsiinnarani aammali qaffakkiartorneranik appariartorneranilluunniit takutitsisoq amerlasuut ilisimavaattaaq.
Qassilli misissuummik atuisuuppat? Type 1-diabetesimillu nappaateqartut tamarmik iluaqutigisinnaavaat? Karoline Schousboe, Steno Diabetes Center Odense-mi ph.d. nakorsaanerlu, diabetes pillugu ilisimatusartut immikkoortuisa arfineq aappaanni matumani tamatumunnga paasisaqartitsissaaq.
Imm. arfineq pingajuat: Nappaat diabetes Savalimmiuni
Ukiut qulit matuma siorna type 2 diabetesip Savalimmiuni qanoq annertutigisumik atugaanera misissorneqarpoq. Misissuinermi paasisat, kingorna qaammarsaanerni nakorsallu ilinniartitaaneranni atorneqarput– taamatuttaaq Savalimmiuni diabetesimik nappaatillit pillugit peqatigiiffik nutaaq 2013-imi suliniummit misilittakkanik iluaquteqarpoq.
Taamanikkut paasisat sorpiaanerat – qanorlu iliornikkut qassit type 2 diabetesimik nappaateqarnerisa imal. taama nappaateqalernissamut ersiuteqarnerisa qanoq paasineqartanerat, annertunerusumik tusagaqarfigiuk.
Tamakku Jens Andreassenimit, nakorsaatit atorlugit nakorsartittunut immikkoortortami nakorsaanermit, Savalimmiuni Steno Diabetes Centerimi diabetesimik nappaateqqartunut nakorsiartitsivimmi akisussaasumit, immikkoortumi matumani annertunerusumik tusagaqarfigisinnaavatit.
Imm. qulaaluaat: Peqqinnartumik peroriartorneq diabetisimut pitsaaliuutaavoq
Inuusutsilluni peqqinnartumik peroriartorneq inersimasunngornermi ass. type 2 diabetisimut pitsaaliuutaasinnaavoq.
Meeqqat inuusuttullu ilaqutariinni inuttut atukkatigut unammilligassaqarnerpaat akornanni, pualavallaartut amerliartuinnarnerat unitsinniarlugu misiliinerpassuit iluatsissimanngillat. Suliniummi nutaami, nutaamik eqqarsarluni, meeqqat angajoqqaallu najukkami inuiaqatigiinnik peqqinnartumik inuunissamut ajornannginnerulersitsisunik ilusiliinissamut peqataatinneqarput.
Jane Nautrup Østergaardip, Steno Diabetes Center Aarhusimi suliniummik aqutsisup innuttaasullu peqqissusaat pillugu ilisimatusarnermik tunuliaqutaqartup, tamanna pillugu annertunerusumik oqaluttuarnera, diabetes pillugu ilisimatusartut immikkoortuisa qulaaluaanni tusarnaaruk.
Imm. qulingat: Insulin iisartakkamik taarserneqarsinnaava?
Inuit type 1-diabetesimik nappaateqartut ullormut arlalippassuariarlutik insulimik aalajangersimasumik annertussusilimmik kapisariaqartarput.
Tamanna pisariummat, insulin-ip ilaata iisartakkamik taarserneqarsinnaanera, maanna misissorneqarpoq.
Pernille Emilie Petersen, nakorsaq Steno Diabetes Center Copenhagenimilu ilisimatusartoq, ilisimatusarnermik pissanganartumik avitseqateqartoq, diabetes pillugu ilisimatusartut immikkoortuisa qulinganni tusarnaaruk.
Imm. aqqarnat: Diabetesimik nappaatinillu allanik ataatsikkut nakorsaaneq
Inuit diabetesimik nappaatillit allamillu ataatsimik amerlanerusunilluunniit anigugassaanngitsunik saniatigut nappaatillit, sumiiffinni arlalinni nakorsartikkajupput.
Tamanna nakorsartinneq ataqatigiigunnaarsinnaammat, nakorsartinnermut akisussaaffiup ilaanik annertuumik nammineq tigummisaqartutut misigisinnaaneq pissutigalugu ilungersunarsinnaavoq. Nappaatit arlaannut iluaqutaasoq allamut tamatigut iluaqutaasanngilaq. Tamanna allaat nappaatip ajorseriarneranik kinguneqarsinnaavoq.
Inunnik diabetesimik nappaatilinnik nakorsaanerup, ilisimasaqarfiit arlallit akimorlugit suleqatigiinnut taaneqartartunut katersorsinnaanissaa periarfissaava? Jonas Dahl Andersen, timimik sungiusaasoq, nakorsaanermik ilisimatusarnermi teknologimilu kandidati, Steno Diabetes Center Nordjyllandimilu Ph.d.-nngorniaq, immikkoortumi matumani ilisimasaqarfiit akimorlugit suleqatigiit pillugit annertunerusumik oqaluttuartoq tusarnaaruk.
Imm. aqqaneq aappaat - Diabetesimik patsiseqartumik isikkut nappaateqarnermut piviusorsiortumik anguniagaqarluni misissuineq
Diabetesimik nappaateqartuni isikkut nappaateqalersarneq kingunerluutaavoq navianaatilik kingusissukkut takkuttartoq, piffissaagallartillugulu paasineqanngippat nakorsarneqanngippallu tappiillinermik tappingernermilluunniit kinguneqarsinnaasoq.
Inuit amerlasuut diabetisimik nappaateqartut isimikkut nappaateqalersinnaanermut annertuumik aarlerinartorsiunngikkaluit misissorneqartarput. Akerlianik misissortariallit pilertortumillu nakorsagassat ilaatigut sivisuumik utaqqisariaqartarput.
Taava inuit misissortinnissamut nakorsartinnissamullu pisariaqartitsinerpaat qanoq iliornikkut nassaarineqassappat? Tamanna Stine Bybergip, Steno Diabetes Center Københavnimi aalajangersimasumik sammisaqarluni ilisimatusartup suleqatigiinnillu aqutsisup maannalu Inuunerissaavik Steno Kalaallit Nunaannut attuumassuteqarluni suliaqartup, immikkoortumi matumani akissuteqarfiginiassavaa.