Sumik patsiseqarpa? Patsisaasoq ilisimaneqarajunngilaq, kingornuttagaasinnaavorli. Aap naqitsinerata qaffasinnera uummatikkut taqqatigullu nappaatini allani, pualavallaarnermi, diabetes-imik nappaateqarnermi, imigassartorpallaarnermi il.il. takussaagajuppoq.
Kikkut misissortissappat? Qaffasissumik naqitsinillit amerlanertigut ersiuteqartanngillat. Qaffasippallaarpalli uissannguneq, niaqorlunneq uummammik kassuttoorneq imal. anernikilliorneq misigineqarsinnaapput.
40-ileereersimasuni tamani aap naqitsinerata ilisimanissaa innersuussutaavoq.
Qanoq ilillugu suussusersineqartarpa? Ulluni pingasuni angerlarsimaffimmi eqqisisimatillutit uuttortarneragut suussusersineqartarpoq. Naqitsineq 135/85 qaangersimappagu qaffasippallaassammat, najukkanni Peqqinnissaqarfimmut attaveqassaatit.
Qanoq nakorsarneqartarpa? Inooriaatsinnik allannguinikkut aallu naqitsineranik apparsaammik nakorsaatitornikkut kingunerluuteqarsinnaanerit annikillisissinnaavat. Kingunerluutit tassaasinnaapput qaratsami uummammiluunniit taqqakkut milittoorneq, aanaartoorneq uummatip sulilluarunnaarnera tartulunnerlu.
Illit nammineq qanoq iliorsinnaavit? Tupatoqinak, timit atoruk, taratsut imigassaq lakridsilu ingasaannaveersaakkit. Pualavallaaruit sanigorsarit.
Aap naqitsineranik misissuisarneq: Allamik isumaqatigiissuteqartoqanngippat, ukiumut ataasiarlutit angerlarsimaffinni ulluni pingasuni aap naqitsinera misilittassagit, innersuussutigaarput.
