KOL nappaatitut suussusersisaq nunatsinni annikitsumik atugaasoq, misisuinerup nutaap takutippaa. Uani annertunerusunik paasisassarsiorit.
KOL sunaana?
KOL tassaavoq pualluut anigugassaanngitsoq, anersaartuutit nerukillisimanerat puaallu ipiutaasartaat ajoqusersimanerat. KOL ukiorpassuarni ineriartortarpoq. Tamanna quersornikkut, qiseqarnikkut, anernikilliornikkut akulikitsunillu puakkut aseruuttoortarnikkut malugineqarsinnaassarpoq. Pujortarunnaarnikkut, nakorsaatitornikkut timimillu atuinikkut nakorsarneqartarpoq.
Misissuineq naatsumik oqaatigalugu:
Misissuinermi matumani nunatsinni qassit nappataat KOL suussusersineqarsimasoq paasiniarlugu, allattugaatinut qarasaasiakkut nalunaarsuiffimmiit paasissutissat atorpagut. Tamatuma saniatigut nakorsartinnerisa pitsaassusaa paasiniarparput.
Misissuinerup suna takutippaa?
2022 nunatsinni inuit 884-it nappaataat KOL suussusersineqarsimavoq. Nunatsinni 20-it 79-illu akornanni ukiulinni KOL-imik nappaateqartut 2,2%-iupput. Tamanna isumaqarpoq 2022-imi innuttaasut 20-it 79-illu akornanni ukiullit 2,2%-iisa nappaataat KOL suussusersineqarsimasoq. Nunatta sinneranut sanilliullugit, Nuummi KOL-imik nappaatilittut suussusersisat amerlanerupput. Arnat KOL-imik nappaateqartut angutinit amerlanerupput. Patsisaasutut misissukkat amerlanersaannut, nunatta sinneranut sanilliullugit, Nuummi nakorsartinnerup pitsaassusaa qaffasinneruvoq.
Inerniliineq:
Nunatsinni nappaatip KOL-ip atugaanera misissuiffiginiakkanit assersuuttakkatsinnit annikinneruvoq annikippallaamillu naliliivigineqarsimasinnaalluni. KOL-imik nappaateqalersinnaasunik siusissukkut paasiniaasarnissap ukkanneqaannarnissaa kiisalu nakorsaanerup pitsaassusaanik nakkutilliinerup pitsaanerulersillugulu annertusineqarnissaa innersuussutaavoq.
Ilisimatuussutsikkut allaaserisaq uani atuarsinnaavat.