Danish Diabetes & Endocrine Academy (DDEA), Stine Byberg, Marit Eika Jørgensen aamma Trine Jul Larsen peqatigalugiit, nunatsinni diabetesimik nakorsaaneq pillugu tusarnaagassiorpoq. Taanna uani tusarnaaruk. Tusarnaagassiaq tuluttujuvoq.
Nakorsiartitsivimmiit qanoq ungasitsigisumi najugaqarpit? Uaneerannguaq imal. nuna tamakkerlugu? Nunani killerni peqqinnissakkut ajornanngitsumik sullinneqarsinnaaneq naatsorsuutigilersimavarput, taamaattuaannanngilarli. Inunnulli diabetesimik allamilluunniit inooriaatsimut attuumassuteqartumik nappaatilinnut akuttunngitsumik nakorsartittarialinnut kingunerluutaasartunullu misissortittartussanut, nakorsartissinnaaneq aalajangiisuuvoq.
Nunatsinnisut sumiiffinni avinngarusimasuniittunut, peqqinnissakkut sullinneqarsinnaaneq ulluni arlalinnik sivisussuseqarsinnaavoq. Tamatuma saniatigut nunanit killernit sunnerneqarnerup nunatsinnut annguneragut, diabetesimik napaalaneqalerneranut aallarniutaasinnaasoq aallartippoq. Inuit pinngoqqaataannut allannguutit immikkut ittut diabetesip kingunerluutaanut sunniisinnaapput, misissuinerillu ingerlanniarnerat avinngarusimasuni immikkut unammilligassiisinnaalluni.
Aaqqiissutissanik isumassarsiaqarpoq, taakkulu ilaat qarasaasiaq iluaqutsiullugu misissuinermi najoqqutassanik eqqarsaatigilluagaanerusunik akuutitsipput. Tamanna siunissamut takorluuinerua imal. ulluinnarni nakorsaanerua? Tamanna nalinginnaasumik qanoq ingerlanneqarsinnaava?
Peqqinnissakkut sullinneqarnissamut periarfissaqarnermut atatillugu unammilligassanit isigalugu, innutaasut peqqissusaat qulakkeerniarlugu ilisimatusarnermik tunngaveqarneq pitsaanerulersittariaqarparput.
Innutaasut peqqissusaat nappaatillu atugaanerat pillugit immikkut ilisimasallit pingasut, tamarmik nunatsinnut attuumassuteqartut, diabetesimik nappaateqartunik avinngarusimasuni najugalinnik isumaginninnermut tunngatillugu ajornartorsiutit aaqqiissutissallu oqaluuserigaat tusarnaaruk.
