Sumik patsiseqarpa? Aqajaqqup sanilequtaa insuliiniliortuuvoq, insulin tassaavoq hormoni aammut aniatitaq. Insulin sukkumik nukissiuutissamik aammiittumik timip sananeqaataanut isaatitsisarpoq. Type 2-diabetesimik nappaateqarnermi timi insuliminik atuilluarsinnaasanngilaq. Tamatuma kingunerisarpaa sukkut timip sananeqaataanut isaanatik aammiiginnalersarnerat, taamaalinikkut aap akua sukkoq qaffattarpoq.
Kikkut misissortissappat? Makkunannga ersiuteqaruit diabetesimut misissortinnissaq isumassarsiatsialaavoq: Qasoqqaneq, sanigorneq, imerusunneq, meriannguneq, quikulaneq, aseruuttuukulaneq, malussarsinnaassutsip tappissutsillu akornuteqalernerat. Oqimapallaaruit, naartuninnut atatillugu diabetesilersimaguit imal. qanigisanni diabetesimik nappaateqartoqarpat misissortinnissaq isumassarsiatsialaavortaaq.
Qanoq ilillugu suussusersineqartarpa? Piffissami sivisujaami aap sukkoqassusaa aaversinnikkut paasiniarneqassaaq.
Type-2 diabetesimut suut kingunerluutaagajunneruppat? Piffissami sivisuumi aap akua sukkoq qaffasippallaarsimappat, sianiutit taqqallu ajoqusersinnaapput. Tamatuma tappiillineq, tartut ajoqusernerat, malussarsinnaassutsip annikillinera aallu ingerlanerliornera qaratsami uummammilu taqqakkut milittoorsinnaanermik kinguneqariataarsinnaasoq.
Illit nammineq qanoq iliorsinnaavit? Tupatornerup kingunerluuteqarsinnaaneq annertusisittarpaa. Timimik aalatitsilluartarneq isumatusaarlunilu nerisaqarneq oqimaapalaarnermilu oqilineq, nakorsaanermi pingaaruteqarput nakorsaatitornissarlu pisariaarutsissinnaallugu. Timimik aalatitsilluartarneq aap sukkoqassusaa nalimmassarnissaanut annertuumik sunniuteqarpoq kingunerluutaasartunullu illersuutaallunissaaq.
Nakorsaatit atorlugit qanoq nakorsaasoqartarpa? Type-2 diabetesimik nappaateqartut amerlanersaat nakorsaatitorput. Amerlanertigut aap akuanut sukkumut, aap taqqanut naqitsineranut aallu akuanut orsumut apparsaammik nakorsaaserneqassaatit.
Diabetesimik misissuisarneq: Qanoq akulikitsigisunik misissortittarnissaq inummiit inummut assigiinngilaq ukiumulli minnerpaamik ataasiarluni misissortittoqartassaaq.
Ukiut tamaasa aaversittoqartassaaq, qooq aallu naqitsinera misissorneqartassallutik.
Tamatuma saniatigut isikkat ukiumut ataasiarlugit misissortittarnissaat isillu ukiut allortarlugit misissortarnissaat neqeroorutaavoq. Nakkutilliinermut atatillugu misissortittarnerit diabetesip ajornerulersinnaaneranik pitsaaliisinnaapput, kingunerluutitaanillu pitsaaleeqataasinnaapput kinguartitseqarteqataasinnaallutilluunniit.