Type 1 diabetes sunaana? Type 1 diabetes tassaavoq nappaat anigugassaanngitsoq, aqajaqqup sanilequtaata sananeqaataasa insuliniliortut ajoqusersimanerat. Type 1-diabetes tassanngaannaq takkukkajuppoq. 100-it inortut nunatsinni type 1-diabetesimik nappaateqarput.
Sumik patsiseqarpa? Inunni peqqissuni aqajaqqup sanilequtaata qinersip aammut aniatitaanik hormonimik insuliniliortuuvoq. Insulinip suukkut aammiittut timip sananeqaataanut appakaallutik nukinnguunnissaat isumagisaraa. Type 1-diabetesimik nappaateqartuni timi insuliniliorunnaartarpoq. Suna pillugu inuit ilaasa type 1-diabetesimik nappaateqalersarnerat qularnaatsumik ilisimaneqanngilaq, kingornuttakkanulli tunngasut pisooqataapput.
Kikkut misissortissappat? Soorlu makkunannga ersiuteqaruit diabetesimut misissortinnissaq isumassarsiatsialaavoq: Qasoqqaneq, sanigorneq, imerusunneq, meriannguneq, quikulaneq, aseruuttuukulaneq, malugisinnaassutsip tappissutsillu akornuteqalernerat. Ersiutit aap sukkoqarpallaarneranik patsiseqarput.
Nappaat qanoq ilillugu suussusersineqartarpa? Aaversinnikkut piffisami sivisuumi aap sukkoqassusaa paasiniarneqassaaq.
Type 1-diabetesimut kingunerluutaasartut nalinginnaanerpaat suuppat? Sivisuallaamik aak sukkoqarpallaarpat, sianiutitit taqqatillu ajoqusersinnaapput. Tamanna tappiilliulernermik, tartut ajoquserneqarnerannik, malugisaqarluarsinnaajunnaarnermik- qaratsakkullu uummatikkullu milittoornermik kinguneqarsinnaasumik - aak ingerlaarluarunnaartarluni.
Illit nammineq qanoq iliorsinnaavit? Type 1-diabetes insulinimik nakorsartariaqarpoq. Kingunerluuteqalersinnaaneq tupatornerup annertusisittarpaa. Timimik atuineq aap sukkoqassusaata nalimmassarneqarnissaanut annertuumik sunniuteqarpoq kingunerluutinullu illersuutaaqataalluni. Peqqinnartumik inooriaaseqarnikkut diabetes aqukkuminarnerugajuppoq.
Qanoq nakorsarneqartarpa?
Type 1-diabetesimut nakorsaat pingaarneq tassaavoq insulin kigaatsumik sunniukkiartortartoq, nerinerni sukkasuumik sunniuttartumik aapperlugu. Sunik nerineq, qanoq inneq qanorlu timimik atuitigineq apeqqutaallutik, insulinimik pisariaqartitsineq inummiit inummut assigiinngilaq.
Diabetesimik killiffissiuineq: Qanoq akulikitsigisunik misissortittarnissaq inummiit inummut assigiinngilaq, nalinginnaasumilli ukiumut pingasoriarluni sisamariarluniluunniit, piffissami sivisujaami aap sukkoqassusaa aaversinnikkut misissorneqartarpoq (HbA1). Nunatsinni type 1 diabetesimik nappaateqartut tamarmik aap sukkoqassusaanik ulloq unnuarlu uuttuiuartumik- qaffasippallaalerpat apparpallaarpalluunniit kalerrisaarisinnaasumik- neqeroorfigineqartarput
Tartut, aap taqqanut naqitsinera isikkallu ukiut tamaasa misissorneqartassapput. Tamatuma saniatigut ukiut allortarlugit isit misissorneqartarnissaat neqeroorutaavoq. Nakkutilliinikkut diabetes ajornerulernaveersinneqartarpoq kingunerluutaasartullu pitsaalineqanngikkunik kinguarsarneqarsinnaasarlutik.