Inuunerissaavik Steno Kalaallit Nunaat nutaamik pisortartaarpoq. Taanna tassaavoq nakorsaaneq ilisimatoorlu Marit Eika Jørgensen, Michael Lynge Pedersen, issittumi nakorsaanermik ilisimatooq taarserlugu atorfeqalersussaq.
"Atorfimmi tassani pissanganartumi atorfeqalernissaq qilanaareqaara. Inuunerissaavimmi diabetes nappaatillu inooriaatsimut attuumassuteqartut, ilisimatusarneq qarasaasiakkut nakorsiartitsineq, Peqqinnissaqarfiullu sinneranik suleqateqarneq annertuumik ukkanneqarput. Qilanaaqaanga”, Marit Eika Jørgensen oqarpoq imalu nangilluni:
”Nunatsinni innuttaasut tamarmik, sumi najugaqarneq apeqqutaatinnagu, pitsaasumik nakorsarneqarnissaat pingaartitama ilagaat. Taamaammat qarasaasiakkut nakorsiartitsinermi nutaanik periarfissinneqarnerput, nunarpullu tamakkerlugu inuunerissaavinni sulisunik suleqateqarluarnerput nuannaarutigaara. Tamanna nakorsarneqarnissamut periarfissatigut naligiinnginnermik annikillisaaqqataavoq”.
Marit Inuunerissaavimmut tunngatillugu pilerlaajunngilaq. Inuunerissaavik Steno Kalaallit Nunaanni 2021-imiilli nakorsaanertut ilisimatusartutullu atorfeqarpoq.
”Marit-ip atorfininneragut, ilinniagaqassutsikkut nukittuumik, nunatsinni pissutsinik ilisimasaqarluartumik, Kalaallit Nunaanni Inuunerissaavik Steno-p ineriartorneranik ingerlatitseqqiisoqalernera nuannaarutigaara”, Tina Amondsen Peqqinnissaqarfimmi pisortaaneq iluarisimaarinnilluni oqarpoq, Marit-ip qinersinik/allanillu hormoniliortunik ilisimasaqarluartuullunilu ilisimatusartuunera, ukiuni 25-ini diabetes-imik misilittagaqarnera tamatumalu saniatigut innuttaasut peqqissusaannik misissuinernut tunngatillugu suleqataalluarnera erseqqissaavigalugu.
”Inuunerissaavik Steno Kalaallit Nunaata ineriartortuarnissaa pillugu Marit-ip suleqatiginissaa Peqqinnissaqarfimmi qullersat qilanaaraat”, Peqqinnissaqarfiup pisortaanera nangilluni oqarpoq, tamatumalu peqatigisaanik Michael Lynge Pedersen 2021-imi inuunerissaavimmik siullermik kingornalu Inuunerissaavik Steno Kalaallit Nunaannik pilersitsinermi- minnerunngitsumillu ukiuni 25-ini nunatsinni nakorsatut ilisimatusartutullu qasusuilluni annertoqisumik suliaqarsimanera pillugu qutsavigalugu.
Michael Lynge Pedersenip pisortatut atorfik qimakkaluarlugu Inuunerissaavik Steno-Kalaallit Nunaanniiginnassaaq siunissamilu qarasaasiakkut nakorsiartitsineq nunatsinnilu diabetesimik nakorsaanerup pitsaassususaanik inerisaaqqinneq ukkatassarilissallugit.
Inuunerissaavik Steno Kalaallit Nunaat aningaasaateqarfimmit Novo Nordisk Fonden-imit tapiiffigineqarpoq.